පුංචි තිරය නරඹන කොයි කවුරුත් ඇයට දැක්‌වූයේ පුදුමාකාර ආදරයක්‌. ඒ තරමට නදී චන්ද්‍රසේකර රංගන ශිල්පිනියක්‌ ලෙසට තමන් ඔපදමන චරිත තුළ සැබෑවටම ජීවත් වූ නිළියක්‌. නමුත් කොතරම් සතුටින් නිදහසේ සිටියත් මිනිසුන් හැටියට අපි කා අතරටත් ප්‍රශ්න එන්නේ නොසිතූ විරූ විලාසයකින්. එසේ පැමිණි ප්‍රශ්නයක්‌ නිසා පසුගිය වසර එකහමාරක කාලයක්‌ නදී ගතකළේ නිහඬ ජීවිතයක්‌. නමුත් සත්‍ය කවදා හෝ ජයගනී යන කියමන සනාථ කරමින් නදී වටා තිබූ විශාල කඩඉමකින් ජයගන්න නීතියේ සාධාරණය පසුගිය දා ඇයට වාසනාව ගෙනාවා. මේ සිද්ධිය වටා ගෙතුණ කතාවේ ඇත්ත දැනගන්න අපි නදීට කතා කළා. නදී ඇත්තටම පසුගිය කාලේ සිදුවුණු සිදුවීම මොකක්‌ද?
සෑම වසරකම වගේ 2008 අවුරුද්දේ ලංකාවේ විශිෂ්ටයන් දහදෙනා අතරට කලා ක්‍ෂෙත්‍රයෙන් රංගනය වෙනුවෙන් ලබාදෙන සම්මානය ලැබුණේ මට. ඒත් සමග අවුරුද්දක්‌ ඇමරිකාවේ විශ්ව විද්‍යාලයක රංගනය ගැන ඉගෙන ගන්න ශිෂ්‍යත්වයක්‌ ලැබුණා. උත්සවයට පස්‌සේ දවසක ඇමරිකානු එම්බසියට ගියා රටයන්න වීසා එක ගන්න. එදා දවස පුරාම එම්බසියේ රඳවගෙන ඉඳලා හවස තුනට විතර පොලීසියෙන් ඇවිත් මාව අත්අඩංගුවට ගත්තා. ව්‍යාජ ලේඛනයක්‌ ඉදිරිපත් කරලා විදේශගත වීමට තැත්කිරීම කියන චෝදනාවට.
